El 3r FESTIVAL DE CINE ASTURIANU entama n'Uviéu
El 3r FESTIVAL DE CINE ASTURIANU entama n'Uviéu
El tercer Festival de Cine Asturianu entama’l prósimu día 30 de marzu na ciudá d’Uviéu, un añu más nel escenariu del Teatru Filarmónica hasta’l 4 d’abril del 2007 cuando se fairá la Gala d’entrega de los Fruteros de Cristal, Premios del xuráu del Festival. El Festival de Cine Asturianu concede nesta tercer edición un total de nueve premios: Meyor curtiu n’asturianu y notra llingua, Meyor Actor, Actriz, Guión, Dirección, Documental y Película, amás del Premiu d’Honor. Esti añu concederáse per primer vez el premiu a la meyor película o llargometraxe. Los premios concédelos un xuráu expertu y consisten en dellos Fruteros de Cristal y diplomes en recuerdu de la primer película asturiana, El robu de fruta (1905), de Javier Sánchez Manteola. El 30 de marzu del 2007 fairáse la presentación del 3r Festival de Cine Asturianu a les 6 de la tarde nel salón d’actos del Club de Prensa Asturiana d’Uviéu cola presencia de nominaos a los premios. El llunes 2 d’abril entamará la Gala d’Entamu a les 6 de la tarde nel Teatru Filarmónica cola presentación de los curtiumetraxes finalistes de la Sección Oficial a concursu. El martes 3 d’abril a la mesma hora nel Teatru Filarmónica fairáse la presentación y proyección del documental y de la película ganadores y por último, el miércoles 4 d’abril va facese la Gala de Pieslle cola entrega de premios y homenaxe al productor morciniegu Xuan Gona, Premiu d’Honor del Festival,. L’asistencia a toles gales y presentaciones del Festival ye dafechu gratuíta pa tol públicu.
Juan Gona, Premiu d’Honor del 3r Festival de Cine Asturianu
El productor de cine Juan Gona recibirá’l próximu día 4 d’abril n’Uviéu el Premiu d’Honor del Cine Asturianu que-y concede’l 3r Festival de Cine Asturianu que se fairá nesta ciudá del 30 de marzu al 4 d’abril del 2007. L’escenariu del Teatru Filarmónica de la capital asturiana va ser tamién el marcu onde se-y dedicará un emotivu homenaxe a tola so obra y carrera artístia realizada hasta la actualidá yá que Juan Gona ta trabayando nesti momentu n’abondos proyectos cinematográficos, en tou o en parte siempre relacionaos con Asturies. Juan Martínez Fernández nació en Buslloñe, nel conceyu asturianu de Morcín en 1951 y creó la factoría de cine Producciones Gona col fin de facer non sólo cine d’éxitu comercial sinon tamién d’una alta calidá artística tanto pa les pantalles como pa la televisión. Nesti momentu ye ún de los productores de cine independiente más importantes n’Hespaña y llueu de conseguir abondos éxitos tien la firme intención de que la so tierra asturiana recupere l’antigu esplendor cinematográficu que tuvo n’époques pasaes. Nesti sentíu ye’l promotor de la idea de Primeres Tomes consistente en da-y la oportunidá a los meyores cineastes noveles asturianos de realizar los sos primeros llargometraxes a ser posible rodaos nel marcu incomparable de los escenarios asturianos, emponderaos por tolos cineastes como unos de los meyores pa rodar cine. La película Dama de Porto Pim, rodada dafechu n’Asturies ye otra producción de Juan Gona onde los niveles d’esixencia técnica y artística son evidentes, película na que trabayó D. Gil Parrondo, Premiu d’Honor d’esti mesmu Festival. Otres exitoses películes de Juan Gona como productor son: Santera (1993), Don Juan (1997), El caballero Don Quijote (2002), El año del diluvio (2003), Vete de mi (2006), Oviedo Express (2007). Actualmente tien en procesu de rodaxe n’Asturies la película “Tesoro mío” cola asturiana Teresa Marcos y “Alegría” con Lucinda Torre. Otres películes propiedá de Producciones Gona www.gona.es son: Más allá del deseo (1976), Secuestro (1976), Los hijos de (1976), Volvoreta (1976), Esposa de día amante de noche (1977), Doña Perfecta (1977), Estimado señor juez (1978). El productor ye la figura esencial del trabayu cinematográficu yá que d´él suel entamar la idea artística, la intención y el fin creativu y el so trabayu non siempre ye abondo valoráu o reconocíu. Como director rodó trés documentales asturianos: en 1985 el documental etnográficu “Los Vaqueiros de Alzada de Asturias” y “Muniellos reserva biológica” nel añu 1982, amás d’otru sobre’l pre-románicu astur nel añu 1979. El llabor que ta faciendo Juan Gona por poner al Cine Asturianu con mayúscules nel llugar que se merez nun tien preciu y esti Premiu d´Honor del Festival de Cine Asturianu esperemos que se sume asina a una llarga riestra de reconocimientos y admiración que´l mundu del cine y la sociedá en xeneral debemos a esti asturianu exemplar.
PROGRAMACIÓN DEL 3r FESTIVAL DE CINE ASTURIANU:
- VIENRES 30 de marzu, Club de Prensa Asturiana d’Uviéu:
18 hores: PRESENTACIÓN DEL 3r FESTIVAL DE CINE ASTURIANU. Nominaos a los Premios. Presentacón de los trailers del Festival.
- LLUNES 2 d’abril, Teatru Filarmónica, Uviéu:
18 hores: GALA D’ENTAMU. Ballets ACHÉ-NONAYA d’Uviéu. Presentación de los curtiumetraxes finalistes de la Sección Oficial a Concursu.
- MARTES 3 d’abril, Teatru Filarmónica, Uviéu:
18 hores: Presentación y proyección del documental Suena’l Camín.
20 hores: Presentación y proyección de la película La noche del escorpión.
22 hores: Sección en Pareyo: Proyección de la película VETE DE MI (Producciones Gona, 2006)
- MIÉRCOLES 4 d’abril, Teatru Filarmónica, Uviéu:
18 hores: GALA DE PIESLLE. Ballet BAIDÁN d’Uviéu. Gala d’entrega de los Fruteros de Cristal, Premios del Festival de Cine Asturianu pa les diferentes categoríes y homenaxe a Juan Gona, Premiu d’Honor del Cine Asturianu 2007.
Presentación y Proyección de les obres: Los vaqueiros d’alzada d’Asturies (Juan Gona, 1985) y Muniellos reserva biológica (Juan Gona 1982)
entrada llibre a toles sesiones
--------------------------------------------------------------------------------------------------------------------------------------------------------------------------------------------------------------------
La noche del escorpión acapara les nominaciones
del 3r Festival de Cine Asturianu
La película La noche del escorpión, dirixida por Eva Lesmes atropa ella sola la mayoría de les nominaciones a los premios del 3r Festival de Cine Asturianu que tendrá llugar n’Uviéu del 30 de marzu al 4 d’abril del 2007 nel escenariu del Teatru Filarmónica. La noche del escorpión atropa en conxuntu les nominaciones al Premiu al Meyor Guion, Meyor Actriz (Pilar Rodriguez), Meyor Dirección (Eva Lesmes) y dos nominaciones al Meyor Actor del Festival (Miki Molina y Kike Díaz de Rada) amás del Premiu a la Meyor Película. Producida por Pedro Costa, Igueldo y Barataria nel añu 2002 narra la hestoria d’un crimen irresueltu basáu nunos fechos reales que tuvieron llugar na ciudá de Xixón nos años setenta. La directora xixonesa Eva Lesmes llevó a la pantalla esta película adaptando un guión inspiráu nun llibru del escritor Vicente García Oliva. La segunda obra en númberu de nominaciones ye Ricardo, piezas descatalogadas, de Producciones Imago, dirixida polos asturianos Carlos y Carmen Rico, que opta a cuatro premios del Festival, los premios al Meyor Curtiumetraxe Asturianu notra llingua, Meyor Actriz (Rosario Pardo), Meyor Guion y Meyor Dirección. Cuatro obres opten a trés nominaciones a los premios: Huellas en la nieve, Matar el tiempu, Sístole-Diástole y El último alquimista. Con dos nominaciones tán les obres titulaes: Recuerdos sólidos urbanos y Soleado exterior. Con una sola nominación alcuéntrense les obres siguientes: La colina del cuervu, Último tren a Tahití, Madame Pistolet y Single. Los nominaos al Premiu al Meyor Actor son: Kike Díaz de Rada y Miki Molina por La noche del escorpión; Francisco Vidal y Francisco Racionero por Sístole-Diástole. Les nominaes a la Meyor Actriz son: Rosario Pardo por Ricardo piezas descatalogadas; Pilar Rodríguez por La noche del escorpión, Patricia Cercas por Soleado Exterior y Agripina Menéndez por Matar el tiempu. Los miembros del xuráu oficial d’esti Tercer Festival de Cine Asturianu daránse a conocer el mesmu día de la Gala d’Entamu del día 2 d’abril. La entrega de premios y l’homenaxe al Premiu d’Honor del Cine Asturianu tendrán llugar nel mesmu Teatru Filarmónica a les 6 de la tarde del miércoles 4 d’abril del 2007.
0 comentarios